ទំនាស់ពាក្យសម្ដីបន្តិចបន្តួច ស្ត្រីម្នាក់បានផឹកថ្នាំបាញ់ស្មៅ (អាឆេះ) សម្លាប់ខ្លួន
បាត់ដំបង ៖ ស្ត្រីម្នាក់ បានសម្រេចចិត្តគិតខ្លីធ្វើអត្តឃាត ដោយផឹកថ្នាំបាញ់ស្មៅ (អាឆេះ)សម្លាប់ខ្លួនឯង ក្រោយមានទំនាស់ពាក្យសម្ដី ជាមួយប្ដីបន្តិចបន្តួច ។
ហេតុការណ៍គួរអោយភ្ញាក់ផ្អើលខាងលើនេះ បានកើតឡើងនៅវេលាម៉ោងប្រហែល ២៤និង៤០នាទីរំលងអធ្រាត្រ ឈានចូលថ្ងៃទី១៨ ខែឧសភា ឆ្នាំ២០២៣ នៅចំណុចភូមិពេជ្រចិន្ដា ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង ដែលជនរងគ្រោះមានឈ្មោះ ណេន ចាន់ធឿន ភេទស្រី អាយុ៣៦ឆ្នាំ រស់នៅភូមិ ឃុំកើតហេតុខាងលើ ។
សមត្ថកិច្ចបានបញ្ជាក់ថា នៅមុនពេលកើតហេតុជនរងគ្រោះខាងលើ បានឈ្លោះប្រកែកពាក្យសម្ដីគ្នាជាមួយនិងប្ដី លុះក្រោយមកក៏បានយកថ្នាំបាញ់ស្មៅ (អាឆេះ) មកផឹកសម្លាប់ខ្លួនឯងតែម្ដង បើទោះបីជាមានករអន្តរាគមន៍សង្គ្រោះ ពីក្រុមគ្រូពេទ្យយ៉ាងណាក្តី ប៉ុន្តែនៅមិនអាចសង្គ្រោះបានឡើយ ដោយសារឥទ្ធិពលថ្នាំជ្រាបចូលពេញខ្លួនអស់ទៅហើយ ។
ក្រោយពេលកើតហេតុ សមត្ថកិច្ចបានចុះទៅត្រួតពិនិត្យសាកសពរួចមក ឃើញថា ជនរងគ្រោះពិតជាផឹកថ្នាំបាញ់ស្មៅធ្វើអត្តឃាតសម្លាប់ខ្លួនឯង ពិតប្រាកដមែន បន្ទាប់មកក៏បានប្រគល់សាកសពជូនសាច់ញាតិយកទៅធ្វើបុណ្យតាមប្រពៃណី ៕
ដោយ ៖ សាលី