ប្រជាពលរដ្ឋ ៨២៥គ្រួសារ នៅឃុំរំដោះស្រែ ស្រុកជាំក្សាន្ត ទទួលបានវិញ្ញាបនបត្រសម្គាល់ម្ចាស់អចលនវត្ថុ
ព្រះវិហារ៖ វិញ្ញាបនបត្រសម្គាល់ម្ចាស់អចលនវត្ថុ ១២២៤ក្បាលដី ស្មើនឹង៨២៥គ្រួសារ ត្រូវបាន អាជ្ញាធរធ្វើពិធីប្រគល់ជូនប្រជាពលរដ្ឋ នៅភូមិស្វាយ ឃុំរំដោះស្រែ ស្រុកជាំក្សាន្ត ខេត្តព្រះវិហារ នៅព្រឹកថ្ងៃទី១៨ ខែតុលា ម្សិលមិញនេះក្រោមវត្ដមាន ឯកឧត្តម គីម រិទ្ធី អភិបាលខេត្តព្រះវិហារ ។
មានប្រសាសន៍នាឱកាសនោះឯកឧត្តម គីម រិទ្ធី ថ្លែងកោតសរសើរ និងវាយតម្លៃខ្ពស់នូវស្មារតីយក ចិត្តទុកដាក់ខិតខំ អនុវត្តភារកិច្ចបម្រើសេវាជូនប្រជាពលរដ្ឋ របស់មន្ទីរ–អង្គភាព មន្ត្រីចុះបញ្ជី ទាំងអស់ និងអាជ្ញាធរគ្រប់លំដាប់ថ្នាក់ ដែលបានចូលរួមអនុវត្តកម្មវិធីអនុវិស័យរដ្ឋបាលដីធ្លី ដែល បានខិតខំពុះពាររាល់ការលំបាករហូតឈានដល់ការចែកប័ណ្ណជូនប្រជាពលរដ្ឋនាពេលនេះ ។
ជាមួយនេះឯកឧត្តម ក៏បានសម្ដែងនូវការអបអរសាទរ ជាមួយបងប្អូនប្រជាពលរដ្ឋ ក្នុងភូមិស្វាយ ឃុំរំដោះស្រែ ស្រុកជាំក្សាន្តទាំងអស់ ដែលទទួលបាននូវវិញ្ញាបនបត្រសម្គាល់ ម្ចាស់អចលនវត្ថុ សម្រាប់ប្រើប្រាស់ប្រកបដោយសុវត្ថិភាព និងមានទំនុកចិត្តបន្ថែមទៀត លើកម្មសិទ្ធរបស់ខ្លួន ។ ឯកឧត្តម គីម រិទ្ធី បានបន្ដទៀតថា ការផ្ដល់កម្មសិទ្ធិដីធ្លីនេះ គឺពិតជាបានរួមចំណែកជម្រុញនិង លើកទឹកចិត្តឱ្យប្រជាពលរដ្ឋខិតខំបង្កើនផលិតភាព ក៏ដូចជាការវិនិយោគក្នុងវិស័យ កសិកម្ម ឱ្យកាន់តែប្រសើរឡើងថែមទៀត ។
បន្ថែមពីនេះ ឯកឧត្តម បានស្នើដល់បងប្អូនប្រជាពលរដ្ឋ ដែលជាម្ចាស់ដីមិនបានចូលរួម ធ្វើប្លង់ និងអ្នកមានទំនាស់ សូមធ្វើការសម្របសម្រួល និងសហការជាមួយអាជ្ញាធរ និងមន្ត្រី ជំនាញគ្រប់លំដាប់ថ្នាក់ ដើម្បីធ្វើការបញ្ចប់រាល់ទំនាស់ទាំងឡាយ ងាយស្រួលដល់ក្រមការងារ ចេញប័ណ្ណជូនផងដែរ ។
បើតាមរបាយការណ៍របស់លោក សំ សារឿន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះវិហារ បានឱ្យដឹងថា សម្រាប់តំបន់វិនិច្ឆ័យក្នុងឃុំរំដោះស្រែ សរុបមានចំនួន ៤ភូមិ ក្នុងនោះភូមិស្វាយជាភូមិទី៤ ដែលក្រុមការងារបានអនុវត្តតាមនីតិវិធីនៃ ដំណាក់កាលនីមួយៗ ចាប់ពីថ្ងៃទី១០ ខែ វិច្ឆិកា ឆ្នាំ២០២១ រហូតដល់ពិធីចែកវិញ្ញាបនបត្រ សម្គាល់ម្ចាស់អចលនវត្ថុ លើការចុះបញ្ជីដីធ្លី មានលក្ខណៈជាប្រព័ន្ធនាពេលនេះ ដោយទទួល បានលទ្ធផល ក្នុងការកំណត់ព្រំ និងវិនិច្ឆ័យ ក្នុងភូមិស្វាយសរុបចំនួន ១២២៤ក្បាលដី ស្មើនិង ផ្ទៃដីទំហំ ៦៦៣១ហិកតា ស្មើនិង ៨២៥គ្រួសារ ។ ហើយចំពោះក្បាលដី រក្សាទុកមិនចេញ ប័ណ្ណជូនមានចំនួន ១៨៥ក្បាលដី ក្នុងនោះរួមមាន៖ ក្បាលដីចំនួន ១៨២ក្បាលដី ជាក្បាលដី គ្មានទិន្នន័យ និង ក្បាលដីចំនួន ៣ក្បាលដី ជាដីទំនាស់ ៕
