ស្រ្តីម្នាក់ ត្រូវបានចាប់ខ្លួន ក្រោយចេញមូលប្បទានប័ត្រ ពុំមានសាច់ប្រាក់ ឲ្យអ្នកដទៃ
បន្ទាយមានជ័យ ៖ ស្ត្រីម្នាក់ ត្រូវបានកម្លាំងអាវុធហត្ថខេត្តបន្ទាយមានជ័យ ធ្វើការចាប់ខ្លួន អនុវត្តន៍តាមនីតិវិធី ក្រោយចេញមូលប្បទានប័ត្រ ពុំមានសាច់ប្រាក់ ឲ្យអ្នកដទៃ (ចេញសែកស្អុយ) ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានឲ្យដឹងថា យោងតាមពាក្យបណ្តឹងរបស់ឈ្មោះ ងួន សេងហេង (ហៅរ៉ាដា) ភេទស្រី អាយុ៣៨ឆ្នាំ មានទីលំនៅភូមិពូលុង សង្កាត់រម្យនា ក្រុងសែនមនោរម្យ ខេត្តមណ្ឌលគិរី នៅថ្ងៃទី២៩ ខែឧសភា ឆ្នាំ២០២៣ កម្លាំងការិយាល័យព្រហ្មទណ្ឌ កងរាជអាវុធហត្ថខេត្តបន្ទាយមានជ័យ បានចុះឃាត់ខ្លួនឈ្មោះ យូ ស្រីនី ភេទស្រី អាយុ៣២ឆ្នាំ បច្ចុប្បន្ន រស់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ស្តីពីករណី មិនបំពេញកាតព្វកិច្ចចំពោះឧបករណ៍ ដែលអាចជួញដូរបាន តាមដីកាសម្រេចឱ្យបើកការស៊ើបអង្កេតបឋម លេខ៖៦៥៣ អយ.ក ចុះថ្ងៃទី១៧ ខែឧសភា ឆ្នាំ២០២៣ របស់ព្រះរាជអាជ្ញាអមសាលាដំបូងខេត្តបន្ទាយមានជ័យ ។
លោកថា កាលថ្ងៃទី០៩ ខែឧសភា ឆ្នាំ២០២៣ ឈ្មោះ ងួន សេងហេង (ជនរងគ្រោះ) បានដាក់ពាក្យបណ្តឹងចោទប្រកាន់ទៅលើឈ្មោះ យូ ស្រីនី លើករណី មិនបំពេញកាតព្វកិច្ចចំពោះឧបករណ៍ដែលអាចជួញដូរបាន ប្រព្រឹត្តកាលពីថ្ងៃទី២១ ខែមីនា ឆ្នាំ២០២៣ ។ ក្រោយពីបានទទួលពាក្យបណ្តឹងរបស់ជនរងគ្រោះ ការិយាល័យព្រហ្មទណ្ឌបានធ្វើការកោះហៅឈ្មោះ យូ ស្រីនី ឱ្យចូលមកបំភ្លឺអំពីដំណើររឿងហេតុ នៅវេលាម៉ោង០៨ និង៣០នាទី ថ្ងៃទី២៩ ខែឧសភា ឆ្នាំ២០២៣ ដោយជនសង្ស័យឈ្មោះ យូ ស្រីនី បានចូលខ្លួនមកបំភ្លឺតាមការកោះហៅ និងបានឆ្លើយបំភ្លឺតាមដំណើររឿងហេតុដែលបានកើតឡើង ឃើញមានពិរុទ្ធភាពនៃបទល្មើសខាងលើ ទើបកម្លាំងជំនាញបានមានចំណាត់ការតាមនីតិវិធីតែម្តង ។
ក្រោយឃាត់ខ្លួន តាមដីកាសម្រេច ឱ្យបើកការស៊ើបអង្កេតបឋម លេខ៖៦៥៣ អយ.ក ចុះថ្ងៃទី១៧ ខែឧសភា ឆ្នាំ២០២៣ របស់ព្រះរាជអាជ្ញាអមសាលាដំបូងខេត្តបន្ទាយមានជ័យ ជនសង្ស័យបានសារភាពថា ខ្លួនពិតជាបានចេញមូលប្បទានប័ត្រពុំមានសាច់ប្រាក់ (សែកស្អុយ) ឱ្យទៅដេីមបណ្តឹងពិតប្រាកដមែន ។
យោងតាមពាក្យបណ្ដឹង និងចម្លើយសារភាព ជនសង្ស័យ ត្រូវបានកម្លាំងជំនាញ កសាងសំណុំរឿង បញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់ ៕
