ពលរដ្ឋភៀសសឹក ៥០០គ្រួសារ មកពីភូមិព្រៃចាន់ និងភូមិជោគជ័យ ទទួលអំណោយសម្ដេចធិបតី ហ៊ុន ម៉ាណែត
បន្ទាយមានជ័យ ៖ ប្រជាពលរដ្ឋភៀសសឹកមកពីភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ចំនួន ៥០០ គ្រួសារ ដែលបានជន្លៀសមករកទីកន្លែងសុវត្ថិភាព ទទួលបានអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ។
ការណ៍នេះធ្វើឡើងនៅព្រឹកថ្ងៃទី១៥ ខែវិច្ឆិកា ឆ្នាំ២០២៥ នាវត្តច័ន្ទស៊ី ស្ថិតក្នុងភូមិកូប ស្រុកអូរជ្រៅ ខេត្តបន្ទាយមានជ័យ ក្រោយមការដឹកនាំដោយលោកជំទាវ ជូរ ប៊ុនអេង រដ្ឋលេខាធិការក្រសួងមហាផ្ទៃ អមដំណើរដោយឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ, ឯកឧត្ដម អ៊ុំ រាត្រី អភិបាលខេត្តបន្ទាយមានជ័យ រួមនឹងមន្ត្រីរាជការជាច្រើនរូបទៀតផងដែរ ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានពាំនាំនូវប្រសាសន៍ផ្ដាំផ្ញើសួរសុខទុក្ខ បងប្អូនប្រជាពលរដ្ឋជនភៀសសឹក ពីសំណាក់សម្ដេចធិបតី ហ៊ុន ម៉ាណែត និងលោកជំទាវបណ្ឌិត ផងដែរ ដែលជានិច្ចកាលសម្ដេចធិបតី និង លោកជំទាវបណ្ឌិត តែងតែគិតគូរយកចិត្តទុកដាក់ជាប់ជាប្រចាំចំពោះសុខទុក្ខប្រជាពលរដ្ឋគ្រប់ពេលវេលា គ្រប់ទីកន្លែង ។
អំណោយដែលត្រូវបានប្រគល់ជូន ក្នុងគ្រួសារទទួលបាន ៖ អង្ករ ២៥គីឡូក្រាម, មី ១កេស, ថ្នាំមូស ២ដប, ទឹកសុទ្ធ ១យួរ, ទឹកត្រី១ដប, មុង១ ភួយ ១ ខ្នើយ ១, ថវិកា ១០ម៉ឺនរៀល ។
សូមបញ្ជាក់ថា បងប្អូនប្រជាពលរដ្ឋជនភៀសសឹកទាំងអស់ បានចាកចេញពីផ្ទះនៅភូមិព្រៃចាន់ ភូមិជោគជ័យ មកទីកន្លែងសុវត្ថិភាព បន្ទាប់ពីយោធាថៃបានបាញ់ប្រហារមកលើប្រជាពលរដ្ឋស្លូតត្រង់កម្ពុជា នៅភូមិព្រៃចាន់ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥ បណ្ដាលអោយពលរដ្ឋស្លាប់ ១នាក់ រងរបួសធ្ងន់ ៣នាក់ ៕
