តុលាការបង្គាប់ឲ្យ នាំខ្លួនអនីតិជនម្នាក់ ករណី ធ្វើឲ្យខូចខាតដោយចេតនា និងកាន់កាប់ ឫដឹកជញ្ជូនអាវុធខុសច្បាប់
បន្ទាយមានជ័យ ៖ អនីតិជនម្នាក់ ដែលជាជនត្រូវចោទ ពីបទ ធ្វើឲ្យខូចខាតដោយចេតនាមានស្ថានទម្ងន់ទោស និងកាន់កាប់ ឫដឹកជញ្ជូនអាវុធដោយគ្មានការអនុញ្ញាត ត្រូវបានកម្លាំងអាវុធហត្ថខេត្តបន្ទាយមានជ័យ ធ្វើការឃាត់ខ្លួន តាមចេញដីការបង្គាប់ឲ្យនាំខ្លួន របស់សាលាដំបូងខេត្តបន្ទាយមានជ័យ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារស្រាវជ្រាវ និងបង្ក្រាបបទល្មើស បានឱ្យដឹងថា ក្រោយទទួលបានដីការបង្គាប់ឲ្យនាំខ្លូន របស់លោក ឈឹម ឬទ្ធី ចៅក្រមស៊ើបសួរ នៃសាលាដំបូងខេត្តបន្ទាយមានជ័យ កម្លាំងអាវុធហត្ថស្រុកភ្នំស្រុក ដឹកនាំដោយលោកវរសេនីយ៍ត្រី ឈឹម ប៊ុនឈឿម មេបញ្ជាការអាវុធហត្ថស្រុកភ្នំស្រុក នៅថ្ងៃទី៣០ ខែមករា ឆ្នាំ២០២៤ បានចុះឃាត់ខ្លួនជនត្រូវចោទឈ្មោះ ណាន ឧត្តម ហៅ ដំ ភេទប្រុស អាយុ១៦ឆ្នាំ អាសយដ្ឋានបច្ចុប្បន្ននៅភូមិប៉ោយស្នួល ឃុំប៉ោយចារ ស្រុកភ្នំស្រុក ពីបទធ្វើឲ្យខូចខាតដោយចេតនាស្ថានទម្ងន់ទោស និងកាន់កាប់ ឫដឹកជញ្ជូនអាវុធដោយគ្មានការអនុញ្ញាត ដែលប្រព្រឹត្តកាលពីថ្ងៃទី០៨ ខែសីហា ឆ្នាំ២០២៣ នៅចំណុចភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណខេត្តបន្ទាយមានជ័យ។
លោកបន្តថា ក្រោយឃាត់ខ្លួន ជនត្រូវចោទខាងលើ ត្រូវបាន ការិយាល័យបទល្មើសព្រហ្មទណ្ឌ កងរាជអាវុធហត្ថខេត្តបន្ទាយមានជ័យ កសាងសំណុំរឿងបញ្ជូនទៅសាលាដំបូងខេត្តហើយ នៅព្រឹកថ្ងៃទី០១ ខែកុម្ភៈ ឆ្នាំ២០២៤ ៕
