អភិបាលស្រុកស្ទោង លើកចិត្តកីឡាករនិងអត្តពលលិក ត្រូវខិតខំប្រកួតឱ្យអស់ពីសមត្ថភាព ដើម្បីទទួលជ័យជំនះគ្រប់វិញ្ញាសា
កំពង់ធំ ៖ លោកសាយ គឹមឡម អភិបាលស្រុកស្ទោង បានលើកទឹកចិត្តដូច្នេះក្នុងឱកាសដែលលោកអញ្ជើញជួបសំណេះសំណាលលើកទឹកចិត្តកីឡាករ កីឡាការិនីនិងអត្តពលិកដែលត្រៀមខ្លួនសម្រាប់ចេញដំណើរទៅប្រកួតកីឡាសិស្សមធ្យមសិក្សាថ្នាក់ជាតិឆ្នាំ២០២៥នៅឯរាជធានីភ្នំពេញ កាលពីរសៀលថ្ងៃទី ០៥ ខែមិថុនា ឆ្នាំ២០២៥ នៅអគាររដ្ឋបាលស្រុកស្ទោង។
ជាមួយគ្នានេះ លោកបានលើកទឹកចិត្តថែមទៀតដល់កីឡាករ កីឡាការិនី និងអត្តពលិកទាំងអស់ត្រូវខិតខំរក្សានូវសាមគ្គីភាពផ្ទៃក្នុង ការរួបរួមសាមគ្គីព្រួតដៃគ្នាជាធ្លុងមួយ ស្មារតីក្រុមនិងសហការគ្នាខ្ពស់ ដែលជាកត្តាចម្បងបំផុតដែលនាំយើងទទួលបានជ័យជំនះ ហើយត្រូវខិតខំថែរក្សាសុខភាពឱ្យបានល្អជាប្រចាំនិងស្ដាប់ដំបូន្មានគ្រូបង្វឹកឱ្យបានខ្ជាប់ខ្ជួនផងដែរ។
ទន្ទឹមនិងនេះលោក សុត វិច្ឆិកា នាយកវិទ្យាល័យរស្មីសោភ័ណ តំណាងគ្រូបង្វឹក កីឡាករ កីឡាការិនី និងអត្តពលិកទាំងអស់ បានប្ដេជ្ញាចិត្តខ្ពស់ក្នុងការចូលរួមប្រកួតដើម្បីដណ្ដើមយកជ័យជំនះ ជូនសាលាក៏ដូចជារដ្ឋបាលស្រុកស្ទោងនិងខេត្តកំពង់ធំផងដែរ។
សូមបញ្ជាក់ថាស្រុកស្ទោងនឹងបញ្ជូនកីឡាករកីឡាការិនីនិងអត្តពលិកលើវិញ្ញាសាបីក្នុងនោះរួមមានកីឡាបាល់ទះបុរស លោតចម្ងាយបុរសស្ត្រីនិងដើរចម្ងាយ ហើយកាលបរិច្ឆេទប្រកួតនឹងចាប់ផ្ដើមពីថ្ងៃទី ៦រហូតដល់ថ្ងៃទី ១៦ខែមិថុនាឆ្នាំ ២០២៥ ហើយក្នុងឱកាសនោះដែរលោកសាយ គឹមឡម បានឧបត្ថម្ភដល់កីឡាករកីឡាការិនីនិងអត្តពលលិកទាំងអស់នួន១៨នាក់ ដែលម្នាក់ៗទទួលបានថវិកាចំនួន ៤ម៉ឺនរៀល និងលោកនាយកគ្រូបង្វឹក៤នាក់ ដែលម្នាក់នូវថវិកា៥ម៉ឺនរៀលផងដែរ ៕







