ច្រកទ្វារអន្តរជាតិប៉ោយប៉ែត ថៃបើកម៉ោង៨ កម្ពុជាបើកម៉ោង៩

បន្ទាយមានជ័យ ៖ បន្ទាប់ពីមានការបិទច្រកមុនកំណត់ ពីសំណាក់ភាគីថៃជាឯកតោភាគី ច្រកទ្វារអន្តរជាតិប៉ោយប៉ែត ច្រកទ្វារអន្តរជាតិស្ទឹងបត់ ក៏ដូចជាច្រកតំបន់ចំនួន ២ទៀត ត្រូវបានបិទកាលពីវេលាម៉ោង៤ ម្សិលមិញ លុះដល់ថ្ងៃទី៨ ខែមិថុនា ឆ្នាំ២០២៥ ភាគីថៃបានបើកច្រកខាងថៃនៅម៉ោង ៨ព្រឹក រីឯកម្ពុជាបើកច្រកខាងកម្ពុជានៅម៉ោង ៩ព្រឹក ។

ជាមួយនឹងការបើកច្រកពីសំណាក់កម្ពុជា នៅម៉ោង ៩ព្រឹកនេះ ភាគីថៃបានមកជួបជាមួយសមត្ថកិច្ចកម្ពុជាម្ខាងរបងម្នាក់ ដោយខាងភាគីថៃ បានស្នើឲ្យកម្ពុជា បើកច្រកនៅម៉ោង ៨ព្រឹកដូចគេដែរ តែខាងកម្ពុជាបានបដិសេធ ដោយសារជាគោលការណ៍របស់ថ្នាក់ដឹកនាំ ត្រូវបើកនៅម៉ោង ៩ព្រឹកវិញ ។

ជាមួយនឹងការចម្រូងចម្រាស់ និងបិទច្រកជាឯកតោភាគីនេះ បានបង្កចលាចលដល់ពលរដ្ឋទាំងពីរប្រទេស នៅនឹងមាត់ច្រកទ្វារអន្តរជាតិប៉ោយប៉ែត ធ្វើឲ្យពលរដ្ឋថៃដែលរស់នៅ និងធ្វើការក្នុងក្រុងប៉ោយប៉ែត ប្រញាប់ចេញទៅប្រទេសថៃវិញ តែមិនទាន់អស់នោះទេ បានបន្តនៅព្រឹកថ្ងៃនេះទៀត មុននឹងខាងកម្ពុជាបើកច្រកឲ្យចេញត្រឡប់ទៅប្រទេសវិញ ពលរដ្ឋថៃបានមានការកក់ស្ទះត្រៀបត្រា នៃមាត់ច្រកខាងកម្ពុជា ។ ដោយឡែកអាជីវករខ្មែរយើងកាលពីម្សិលមិញ ក៏មានការកក់ស្ទះត្រៀបត្រា នៅក្នុងទឹកដីថៃផងដែរ។ ហើយថ្ងៃនេះ យើងរង់ចាំមើលថា មានអាជីវករខ្មែរយើង ដែលនៅក្នុងផ្សាររុងក្លឿ វិលត្រឡប់មកកម្ពុជាវិញដែរឬយ៉ាងណា ៕