សមត្ថកិច្ចថៃតាមព្រំដែន ឃាត់ខ្លួនពលករខ្មែរ-ថៃ ២៧នាក់ ដែលលួចឆ្លងដែនតាមព្រំដែនកម្ពុជា-ថៃ
បន្ទាយមានជ័យ ៖ ពលរដ្ឋខ្មែរ និងពលរដ្ឋថៃ សរុប២៧នាក់ ត្រូវបានសមត្ថកិច្ចតាមបន្ទាត់ព្រំដែនរបស់ថៃ ធ្វើការព័ទ្ធបង្ក្រាបបានកាលពីថ្ងៃទី២២ ខែសីហា ឆ្នាំ២០២៥ ក្នុងភូមិសាស្ត្រស្រុកអារញ្ញប្រាថេត ខេត្តស្រះកែវ ប្រទេសថៃ ខណៈលួចឆ្លងដែនតាមព្រំដែនកម្ពុជា-ថៃ ដើម្បីស្វែងរកការងារធ្វើ ។
តាមប្រភពព័ត៌មានរបស់សារព័ត៌មានថៃ បានឲ្យដឹងថា ប្រតិបត្តិការខាងលើ មាន២ករណី ៖ ទី១ នៅថ្ងៃទី២១ ខែសីហា ឆ្នាំ២០២៥ សមត្ថកិច្ចចម្រុះថៃ បានឃាត់ក្រុមពលករខ្មែរ ចំនួន១៤នាក់ ស្រី០៦នាក់ ក្មេង០៣នាក់ នៅចំណុចផ្លូវជាតិក្បែរចម្ការអំពៅ ក្នុងភូមិផានសឿក ឃុំ ផាន់សឿក ស្រុកអារញ្ញប្រាថេត ខេត្តស្រះកែវ ចម្ងាយប្រហែល ២៥០ម៉ែត្រពីព្រំដែន ។ ពលករខ្មែរទាំងនោះបានប្រាប់សមត្ថកិច្ចថៃថា ពួកគេឆ្លងដែន ដើម្បីស្វែងរកការងារធ្វើនៅស្រុកអារញ្ញប្រាថេត ដូចជាកាប់ដើមត្នោត អំពៅ និងការងារតាមចម្ការជាដើម ។
ករណីទី២ ថ្ងៃទី២២ ខែសីហា ឆ្នាំ២០២៥ សមត្ថកិច្ចចម្រុះថៃ បានឃាត់ក្រុមពលករថៃ បានឃាត់ខ្លួនក្រុមពលករថៃ ចំនួន១២នាក់ ស្រី០៦នាក់ ខណៈដើរឆ្លងកាត់ចម្ការអំពៅ ឆ្ពោះទៅប្រទេសកម្ពុជា នៅស្រុកអារញ្ញ ខេត្តស្រះកែវ ប្រទេសថៃ ។ ក្រោយឃាត់ខ្លួនពលករថៃទាំងនោះ បានសារភាពថា ពួកគេត្រូវបានគេបញ្ចុះបញ្ចូលឱ្យធ្វើការតាមរយៈទំព័រហ្វេសប៊ុក ដែលអះអាងថា ផ្តល់ការងារនៅខាងក្រោយផ្សាររោងក្លឿ ពេលមកដល់ស្រុកអារញ្ញ គេនាំទៅរមណីយដ្ឋានមួយមុននឹងត្រូវរថយន្តភីកអាប់ ដឹកយកទៅព្រំដែន ហើយអ្នកបើកបរបានបញ្ជាឱ្យពួកគេចេញពីរថយន្ត ហើយដើរកាត់ចំការអំពៅ ដើម្បីរង់ចាំមគ្គុទ្ទេសក៍ខ្មែរ មកទទួលពួកគេនៅត្រើយម្ខាង ។
ក្រោយឃាត់ខ្លួនពលករខ្មែរ និងពលករថៃ ទាំងអស់ត្រូវបានសមត្ថកិច្ចថៃ បញ្ជូនទៅកាន់ប៉ុស្តិ៍នគរបាលព្រែកណាំសៃ ដើម្បីសាកសួរ និងចាត់ការតាមនីតិវិធីច្បាប់ ៕
