ប្រគល់វិញ្ញាបនបត្រសម្គាល់ម្ចាស់អចលនវត្ថុ ៦.៣៥៥ប័ណ្ណ ជូនពលរដ្ឋក្នុងភូមិសាស្ត្រខេត្តបន្ទាយមានជ័យ
បន្ទាយមានជ័យ ៖ វិញ្ញាបនបត្រសម្គាល់ម្ចាស់អចលនវត្ថុ ចំនួន៦.៣៥៥ប័ណ្ណ ត្រូវបានប្រគល់ជូនប្រជាពលរដ្ឋ ក្នុងពិធីប្រកាសបញ្ចប់ការវាស់វែង និងប្រគល់វិញ្ញាវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋស្ថិតក្នុងភូមិសាស្ត្រខេត្តបន្ទាយមានជ័យ នាថ្ងៃទី៣០ ខែមិថុនា ឆ្នាំ២០២៥ នៅសាលាខេត្តបន្ទាយមានជ័យ ។
ពិធីនេះប្រព្រឹត្តទៅក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម, ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាប្រធានក្រុមការងារថ្នាក់ជាតិចុះជួយមូលដ្ឋានខេត្តបន្ទាយមានជ័យ, និងមានការចូលរួមពីសំណាក់ឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ, ឯកឧត្តម អ៊ុំ រាត្រី អភិបាលខេត្តបន្ទាយមានជ័យ, លោក មាស ដារ៉ា ប្រធានសុរិយោដីខេត្តបន្ទាយមានជ័យ រួមនិងមន្ត្រីរាជការ ប្រជាពលរដ្ឋជាច្រើននាក់ទៀតផងដែរ ។
ឯកឧត្តម អ៊ុំ រាត្រី បានមានប្រសាសន៍ថា ស្របតាមគោលនយោបាយ ៣ចំណុច របស់ក្រសួងរៀបចំដែនដី នគរូបនីយកម្ម និងសំណង់ ថ្ងៃនេះខេត្តបន្ទាយមានជ័យ បានធ្វើពិធី ប្រកាសបញ្ចប់ការវាស់វែង និងប្រគល់វិញ្ញាបនបត្រសម្គាល់ម្ចាស់អចលនវត្ថុ ជូនដល់ប្រជាពល ចំនួន ៦.៣៥៥ ប័ណ្ណ ក្នុងនោះមាន ៖ ២ក្រុង ៧ស្រុក ស្មើនឹង ១២សង្កាត់ ៥៥ឃុំ និង ៦៦៤ភូមិ, ក្បាលដីប៉ាន់ស្មានចុងក្រោយទូទាំងខេត្តបន្ទាយមានជ័យ សរុបមានចំនួន ៦៧៨. ៦៦៥ក្បាលដី, លទ្ធផលការងារសម្រេចបានក្នុងខែមិថុនា ឆ្នាំ២០២៥ វាស់វែងក្បាលដីបាន ចំនួន ៧០៨.១៥៦ក្បាលដី, ចែកប័ណ្ណដល់ដៃប្រជាពលរដ្ឋរួចហើយ បានចំនួន ២៩៦. ៧២៣ប័ណ្ណ ។
ឯកឧត្តម សាយ សំអាល់ បានមានប្រសាសន៍ថា ខេត្តបន្ទាយមានជ័យ ជាខេត្តទី៨ ដែលត្រូវបានប្រកាសបិទបញ្ចប់ការវាស់វែងនាថ្ងៃទី៣០ ខែមិថុនា ឆ្នាំ២០២៥ នេះ បន្ទាប់ពី ខេត្តកំពង់ចាម, ស្វាយរៀង, សៀមរាប, កំពង់ស្ពឺ, ព្រះសីហនុ, កំពង់ឆ្នាំង និងខេត្តឧត្តរមានជ័យ ។ ឯកឧត្តម ក៏បានកោតសរសើរនិងវាយតំលៃខ្ពស់ ចំពោះថ្នាក់ដឹកនាំមន្ទីររៀបចំដែនដីនគរូបនីយកម្ម និងសំណង់ ដែលតែងតែយកចិត្តទុកដាក់ ក្នុងការកសាងធនធានមនុស្ស សំដៅពង្រឹងសមត្ថភាពជំនាញបង្កើនការទទួលខុសត្រូវ ចំពោះតួនាទីនិងភារកិច្ចក្នុងការបំរើប្រជាពលរដ្ឋ ក៏ដូចជាប្រទេសជាតិ ប្រកបដោយ ប្រសិទ្ធភាពខ្ពស់ ។ ឯកឧត្តម ក៏បានថ្លែងអំណគុណចំពោះប្រជាពលរដ្ឋ ដែលបានចូលរួមស្វែងយល់ អំពីការចុះបញ្ជីដីធ្លីមានលក្ខណៈជាប្រព័ន្ធ ដើម្បីពិនិត្យថា ការចុះបញ្ជីមានលក្ខណៈជាប្រព័ន្ធ មានភាពសុក្រឹត្យទាំងការងារបច្ចេកទេស និងផ្លូវច្បាប់ត្រឹមត្រូវ មានសុវត្តិភាព នៃការកាន់កាប់ដីធ្លី កាត់បន្ថយទំនាស់និងជំរុញឲ្យមានទីផ្សារដីធ្លីប្រកបដោយប្រសិទ្ធភាពខ្ពស់ កាត់បន្ថយភាពក្រីក្រ ស្ថេរភាពសង្គម និងការអភិវឌ្ឍសេដ្ឋកិច្ចឲ្យកាន់តែប្រសើឡើង ស្របតាមគោលនយោបាយរបស់រាជរដ្ឋភិបាលដែលមាន សម្តេចបវរធិបតី ហ៊ុន ម៉ាណែត ជានាយករដ្ឋមន្ត្រី ៕
