រកឃើញមានសារធាតុគីមីហាមឃាត់ Formalin ក្នុងគ្រឿងសមុទ្រ និងសារធាតុគីមីហាមឃាត់ Borax ក្នុងពពុះសណ្តែក លក់លើទីផ្សារក្នុងក្រុងបាត់ដំបង
បាត់ដំបង ៖ កាលពីថ្ងៃទី១៧ ខែមិថុនាឆ្នាំ២០២៥ មន្ត្រីអធិការកិច្ចម្ហូបអាហារនៃសាខា ក.ប.ប.ខេត្តបាត់ដំបង បាននាំយករថយន្តមន្ទីរពិសោធន៍ចល័តផ្នែកម្ហូបអាហារ សហការជាមួយគណៈគ្រប់គ្រងផ្សារ បានចុះត្រួតពិនិត្យធ្វើតេស្តបឋមលើគ្រឿងសមុទ្រ នំបញ្ចុក ពពុះសណ្តែក គុយទាវសរសៃធំ គុយទាវសរសៃតូច និងប្រហិតបៀក ចំនួន០៦តូបនៅក្នុងផ្សារថ្មី ស្ថិតក្នុងភូមិ១៣មករា សង្កាត់ព្រែកព្រះស្តេច ក្រុងបាត់ដំបង។
ជាមួយយុទ្ធនាការខាងលើនេះដែរ មន្ត្រីជំនាញបានដកយកគំរូចំនួន១០គំរូ ដែលក្នុងនោះមាន (Formalin ចំនួន៥គំរូ និងBorax ចំនួន៥គំរូ) ដើម្បីពិនិត្យធ្វើតេស្តបឋម ហើយជាលទ្ធផល រកឃើញមានសារធាតុគីមីហាមឃាត់ Formalin ក្នុងគ្រឿងសមុទ្រ និង មានសារធាតុគីមីហាមឃាត់ Borax ក្នុងពពុះសណ្តែក ដូចជា ,ដៃមឹកធំ ចំនួន ៤.៤០គីឡូក្រាម .មឹករំដួល ចំនួន៣.២០គីឡូក្រាម ,ពពុះសណ្តែក០.៥០គីឡូក្រាម សរុបចំនួន:៨.១០គីឡូក្រាម ។
ក្រោយធ្វើតេស្តរកឃើញមានសារធាតុគីមីហាមឃាត់ Formalin និង សារធាតុគីមីហាមឃាត់ Borax មុខម្ហូបខាងលើ មន្រ្តីជំនាញបានដកហូតយកមកកំទេចចោលនៅសាខា ក.ប.ប. តាមនីតិវិធី និងបានធ្វើកិច្ចសន្យាដល់អាជីវករ ដើម្បីបញ្ឈប់ការលក់គ្រឿងសមុទ្រដែលមានសារធាតុគីមីហាមឃាត់ តទៅទៀតផងដែរ ៕
ដោយ ៖ សាលី